Årsmelding Onarheim Idrettslag 2025

Styret 2025

Leiar

Morten Nordal

Nestleiar

Magne Storesætre

Styremedlem

Mari Gregersen Rosseland

Styremedlem

Aleksander Nordal

Styremedlem

Fredrik Hansen

Kasserar og 1. vara

Lise Skjåk Dalen

2. vara

Margarita Eduardovna

Medlemer

Laget har per 31.12.2025 130 betalande medlemer.

• Under 17 år: 36 (44 i 2024)
• Over 17 år: 94 (109 i 2024)
• Støttemedlemer: 3 (6 i 2024)

Aktivitet gjennom året

• Det var nokre periodar med snø og fine skiforhold i januar og halve februar. Varmestova var open, med fyr i bålpanner fleire dagar og servering av både kaffi, buljong og vaflar.
• Det vart køyrt løyper så ofte som mogleg med scooteren. Laget har fire sjåførar som deler denne jobben etter eiga vaktliste.
• Kom deg ut-dagen vart arrangert i varmestova 11. januar i lag med Tysnes Turlag og Uren Luren 4H.
• Årsmøte vart halde på OnarTun 12. februar.
• Varmepumpe vart montert i varmestova 13. februar. 50 % av kostnaden vart dekka av kraftlaget.
• Basaren vart arrangert på palmesøndag på OnarTun med godt oppmøte og ekstra mange fine gevinstar. Her vart det rekordinntekter på heile 101 850 kr.
• Servering av bålkaffi på Blåbærhaugen 10. mars i samband med Kreftsaken veke 10.
• 1. Mai-løpet vart arrangert på skuleplassen med mange born på startstreken.
• Stolpejakt på Austsio, eit samarbeid med Bygdalaget, med 59 stolpar utplassert i perioden 1. mai til 1. november.
• Etter avtale med Lea og skulen vart det i samarbeid med kraftlaget kjøpt inn brytematter som skal brukast på skulen i samband med treninga Lea tilbyr kvar onsdag. Morten laga to vogner til oppbevaring av mattene.
• Nytt digitalt O-kart som dekkjer Skjolda, Løkjen og Grovatnet vart teke i bruk for første gong med O-løp i Sunnhordlandsrankingen 20. mai.
• OIL er også i år med i eit fellesprosjekt med dei andre idrettslaga i kommunen med turorientering. Jon Skjolde er administrator for dette, og i lag med Ketil Skjolde gjer dei ein god jobb. Det er 16 postar plassert rundt om i Tysnesfjellet og fire på Reksteren. Desse er ute frå pinse til 15. oktober.
• 28. juli vart Blåbærhaugen opp arrangert for 13. gong. 75 personar deltok i mosjonsklassen og 28 i konkurranseklassen. (2024-tal: 65/24)
• 22. august vart Tour of Norway for kids arrangert på Alsaker Brygge. Dette er eit svært populært arrangement med 120 born til start. Tusen takk til Gerhard for lån av området og til alle andre som var med og bidrog til dette flotte arrangementet.
• 01.09–31.10 arrangerte OIL i lag med Onarheim Bygdalag 20/30 turar til Blåbærhaugen. Gåvekort sponsa av Haugesund Sparebank vart trekte og delte ut til heldige vinnarar.
• Strandrydding 18. september. Her stilte laget med ryddehjelp på Ånuglo.
• Trim på skulen: Laget har delteke i tre ulike aktivitetar denne hausten: dametrim om måndagane med Ida, bryting om onsdagane med Lea og volleyball om torsdagane med Sofie.
• Desemberdugnad: 15. og 16. desember vart det reparert støtter til terrasse, retta skeiv lyspåle og utført nødvendig grøfting langs vegen inn til Løkjen.
• Romjulstrim frå 25. desember til og med 4. januar gav 389 registreringar i boka og fire gåvekort i premie frå Joker Onarheim.

Prosjekt og samarbeid

• Fleirbruksarena: Her ventar ein på å få avklart grunnavståing frå Tysnes kommune. Dette er sett på vent til bassengplassering er avklart medio våren 2026. Det har vore mange møte der ein søkjer ulike firma og stiftingar om sponsorstøtte.
• Sponsoravtalen mellom Alsaker Fjordbruk og OIL er vidareført. Alsaker sponsar OIL med 20 kr for kvar registrering i turboka på Blåbærhaugen. Pengane skal brukast på og rundt Onarheim skule. Eventuelt anna kan avtalast særskilt.
• I 2022 var det 13 268 registreringar i boka, i 2023 var det 12 231, i 2024 var det 12 597, og i 2025 var det 12 918 registreringar.
• Totalt sidan oppstart av registrering i 2014 er det 140 612 registreringar i bøkene.
• Leiar og nestleiar har også i år vore representerte i Tysnes Idrettsråd. Her har det ikkje vore særskild aktivitet i år.
• Ei stor takk til Alsaker Fjordbruk med Gerhard i spissen, Tysnes Kraftlag og Haugesund Sparebank som sponsorar, og ikkje minst Jon, Ketil og Trond Skjolde som grunneigarar ved Løkjen, for godt samarbeid.